Monday, January 08, 2007
الماسونية و أخواتها أو كيف تكون اسطورة 5
اربط الأسطورة بأساطير مشابهة

في وقت من الأوقات ، اكتشف الحيفاويون ان احد علماء الاثار استطاع الاطلاع على الكتاب ، و تصوريه و بدأ في فك شيفرته ، و قراءة تاريخ العالم من وجهة نظر الحيفاويين ، و الحقائق المخفية التي تربط أحداث تاريخ العالم ببعضه البعض ، ببساطة قتلوا العالم الاثاري الشهير ، و احرقوا كل ما كتب عنهم ، و كل ما ترجمه من الكتاب
بعد ذلك أدركوا أنهم يجب بشكل ما أن يلفتوا أنظار العالم بعيدا عنهم ، فقاموا بتأسيس أسطورة الماسونية
ربطوا بين اساطير تتحدث عن فرسان الهيكل و الماسونية و اهرامات الجيزة و القنابل النووية و الصهيونية و السحر الأسود و نقابة المهندسين المصرية و البيتزا الايطالية و الفرجار أو البرجل و طوبة مصر بريك و ميزان الخيط أو خيط الشاغول و الشمعدان و طاهر القويري و مكتبة الاسكندرية (القديمة مش الجديدة) و نوادي الروتاري ، و نادي هليوليدو بمصر الجديدة و البهائيين و ابل ماكنتوش و نيل ارمسترونج و جيم كاري و الكثير من الحقائق و الأساطير المنتشرة بين الناس ، و استطاعوا خلق اسطورة الماسونية
و نظرا لأن الأنسان هو في الحقيقة مخلوق غبي ، و غير منطقي ، و أهوج و متسرع و غير مفكر أصلا ، فقد صدق الجميع الأسطورة المرتبطة ببعضها بروابط غير منطقية ، بل أن الحيفاوين امعانا في السخرية من البشر ، أضافوا حوادث كاذبة ساخرة و غير منطقية كثيرة أثناء خلقهم للأسطورة ، منها خلق اسطورة كاملة عن سيطرة اليهود على العالم من خلال كتاب روسي لمؤلف فاشل ، و الغريب أن الجميع صدق هذه الأسطورة ، حتى عباس محمود العقاد
هذه الحوادث الساخرة و غير المنطقية ربما كان القصد منها تحدى المطلعين على الأسطورة ، فعلى الرغم من أن كل الاحداث خيالية و مفتعلة الا أنكم تصدقون كل شيء ، تؤمنون بكل شيء ، امجرد أننا نحكي عن مؤامرة و مكيدة ، و لأننا نتبع الخطوات السابقة المكتوبة بالأسود ، و التى تختصر "كيف تكون اسطورة" ، و ربما تطوع البعض و خلق اسطورة أكثر سذاجة مما نخلق ، و شرح لكم كيف خلقنا نحن اسطورة تفوق اليهود لنغطي على اسطورتنا ، و مع ذلك ، ستظلون تؤمنون بأن اسطورة اليهود التي صنعناها حقيقية
posted by ربيع @ 1/08/2007 11:27:00 AM  
11 Comments:
  • At 12:27 AM, Blogger ألِف said…

    نقابة المهندسين!
    إزاي فاتتني دي!!

    لكن طبعا أنت عضو فما مش ممكن تغيب عنك.

     
  • At 1:02 AM, Blogger ربيع said…

    ايوه طبعا
    انت أصلا مالاحظتش الرموز و الدلالات الموجوده في واجهة مبنى النقابة
    و لا نقشة البلاط و الرخام في الأرضيات جوه ، يا بانى ده فيه كلام كبير ان "الكتاب" متشفر بين عروق الرخام ، بس ماحدش واخد باله

     
  • At 10:29 PM, Anonymous Anonymous said…


    تصدق كان ممكن تمشي اسطوره بجد والناس تصدقها لو مكنتش هزرت في النص!!
    بجد ماشي بالفكره حلو اوي لولا السخريه اللي في الوسط كانت الناس صدقت ان في حاجه فعلا اسمها بتوع حيفا

     
  • At 11:02 PM, Blogger ربيع said…

    الله يجازيك يا مالك
    و بعدين لأو انا جد شوية ممكن الحيفاويين يبهدلوني ، يا عم دول عالم واصله وايدهم تطول اي حد ، انت مش شوفت عملوا ايه في البهائيين.؟

     
  • At 5:14 AM, Blogger Azza Moghazy said…

    لا الحمد لله انك اتريقت لازم تخاف على نفسك فعلا الموضوع فيه اغتيالات يا سيدى
    وبعدين انت صدمتنى مش بموضوع نقابة المهندسين لا بموضوع جيم كارى ازاى مخدتش بالى
    بس ذنبهم ايه اللىى مش بيعرفوا يتعاملوا مع الكمبيوتر يتحرموا من النظرية دى
    متنزلها كتاب يا استاذ ربيع

     
  • At 1:58 PM, Blogger ربيع said…

    واحده و خلاص
    شوفي يا ستي ، الحيفاويين بيحرموا التعامل مع أي اجهزة الكترونية ، تصدقي ان حساباتهم الخاصة بالرقم المقدس كلها يتتعمل بالورقة و القلم؟ ، بعضهم طبعا بيحاول اقناع الرؤوساء بميزة الكمبيوتر و أهميته ، وانه هايسهل عليهم حاجات كتيرة أوي ، خصوصا في الاتصالات و الحسابات ، بس طبعا ماحدش قادر ياخد القرار الجرئ ده ، و يبيح استخدام الكمبيوتر
    طبعا تحريم استخدام الاليكترونيات بيخليهم يخافوا يقربوا من جهاز كمبيوتر ، و لا حتى يسمعوا من حد كلام عن الكمبيوتر ، أو أي كلام منشور جوه الكمبيوتر (على انترنت يعني) و ده بيخلي الكلام عنهم هنا بس امن تماما ، انما لو الكلام اتكتب و الأسرار اتعرفت ، هاتبقى مشكلة كبيرة بالنسبة لي

     
  • At 4:49 PM, Blogger الحمقاء المضلله innominate x said…

    تصدق انا كمان كنت حصدق ان الحيفاويين دول بجد افتكرتهم حاجه زي كلو كلكس كلانولا جماعه يهوديه متطرفه هاهاهاها و بعدين اما كملت فهمت انك بتهزر بس تصدق ضحكت

     
  • At 1:08 AM, Blogger Mohamed Elkady said…

    نقابة المهندسين... لأ طمنتني على المستقبل الباهر!

    بس ما شاء الله اسطورة تجنن... هل للموضوع علاقة بما وارء الطبيعة؟
    هذا ما ستكشفه الأحداث

     
  • At 11:43 AM, Blogger ربيع said…

    الاحداث خلصت خلاص ، الحيفاويين أصدروا قرارا بمنع النشر

     
  • At 12:32 PM, Anonymous Anonymous said…

    ده بئه الفرق بينك وبين دان براون
    هو اخترع أسطورة وعمل منها رواية واتعملت فيلم وكسب ملايين الدولارات
    إنت بإمكانك بسهولة اخترع اسطورة وكتابة رواية لكن توقفت عند حدود السخرية والضحك والمدونة
    (هاء)

     
  • At 10:35 PM, Blogger ربيع said…

    هاء باشا
    عندك كلامك؟ لو كتبتها رواية تنشرهالي؟

     
Post a Comment
<< Home
 
 
عن شخصي المتعالي
مدونات
روابط
كتب
أخبار
Free Blogger Templates
© SprinG
eXTReMe Tracker