Wednesday, June 27, 2007
طوبى للمدلعين في الأرض

أنا باحب أشرب لاتيه في ستاربكس اللي في مكرم عبيد ، مع ان اللي في الكوربة أجمل ، كمان باحب جدا آكل تشيكن سيزر سالاد من عند كوستا كافيه ، اللاتيه عنده معقول بس مش حلو قوي ، انا عندي موبايل سامسونج لخط كليك ، و عندي موبايل نوكيا لخط فودافون ، و ناوي أجيب موبايل آي ميت عشان خط اتصالات ، المطبخ بتاعي عاملاه عند عمرو حلمي ديزاين ، و باحب أجيب جزمي من تشارلز آند كيث ، و الهدوم من مانجو ، أنا مش عارفه الناس كانت بتلبس ازاي قبل ما سيتي ستارز يفتح !؟ ، انا هاروح أشترك في من سيربح المليون ، و بالإيمان بالله و العزيمة القوية هاربح المليون ان شاء الله ، اه لو الواحد يظبط شحنة حشيش و يهربها جوه البلد ، تخيل تلاته اربعه طن حشيش الواحد يخزنهم و يقعد يبيع فيهم بالقطاعي ، دا الواحد يبقى ملك زمانه ، انا ناوي أجيب عربية بالتقسيط من المصرية ، بافكر أجيب ألنترا ، شكلها جميل و قوية ، أنا بافكر آخد فلوس من بابا و اشتري ال ياريس الجديدة كاش عشان تبقى أرخص ، ياي ايه العريس المعفن ده ، ده مش حاطط على شعره جيل! ، لا اااا أنا عايز واحده حلوة محجبة بتصلي و بتشتغل في بنك و مستعده تاخد أجازة و تقعد في البيت و هي اللي تجيب العفش كله


هاشتغل في شركة عالمية ، و بعدين شركة أعلم من العالمية الأولانية ، و اعلم منها و هكذا ، لحد ما الاقي فرصة أسافر دبي ، هناك هاخد شقة في برج و مرتب كبير و اشتري عربية بي ام دبليو ، أنا هاروح أعمل كاستنج ، عايزين موديل في فيديو كليب جديد ، ممكن واحد يعجب بيا و أغني ، انا لازم أتنقب ، حاسه بعنين الناس بتاكل جسمي ، حاسه إن ربنا مش بيحبني ، أنا هاعمل بلوج ، و نقعد نعرص على الجميع


عندي عربية ماتريكس ، موبايل نوكيا ، شقة في مدينة نصر ، كنبة اميركان فيرنتشر ، آي بود ، لاب توب توشيبا ، ستيريو سوني ، 3 بدل جاي لاروش ، جزمة هاش بابيز ، جزمة كاتربيللر ، 4 بنطلونات ليفايز ، سماعة بلوتوث نوكيا أصلي ، رواية شيكاغو ، بوكسر أديداس ، كريم بالمرز ، ساعة اوميجا ، بلاي ستيشن 3 ، دبلة بولجاري ، خلاط حمام جاكوب ديلافون ، خلاط مطبخ فريدريك جروهي ، تلفزيون سامسونج بلازما 35 بوصة ، سجاده حرير 1.2*2.3 ، سجاده تانية اوبيسون 2.1*3.2 ، كيتشن ماشين براون ، غسالة اطباق وايت ويستنج هاوس


معايا بكالوريوس الهندسة ، كورس اتش تي ام ال ، كورس جافا، كورس اوراكل ، دبلومه في المانجمينت، كورس سي بلس بلس ، دبلومة تحليل نفسي ، كي إتش أر ايه ، إيه أر إس ، إن إي كيه ، إيه إتش إيه

posted by ربيع @ 6/27/2007 11:00:00 AM  
4 Comments:
  • At 1:18 AM, Blogger egiziana said…

    انا سمعت فين دة الكلام دة قبل كدة؟؟
    يوه ، في الشغل، الجيران ،

     
  • At 12:28 AM, Blogger ربيع said…

    طيب تصدقي إن طفل عنده 5 سنين يقلك الشراب ده مش أديداس أصلي ، عشان كده مش هالبسه؟
    امال لما يكبر هايلبس ايه؟

     
  • At 1:18 PM, Blogger جوستيـن said…

    ظاهره صحيه جدا

     
  • At 6:37 PM, Anonymous Anonymous said…

    جميل كلام لخابيط هايل انك تفضفض بس بالراحة على نفسك وعلى الناس شويه انا\نفسى اقابل حد مفضفضاتى زيك من زمان من انت معظم كلامك بقوله

     
Post a Comment
<< Home
 
 
عن شخصي المتعالي
مدونات
روابط
كتب
أخبار
Free Blogger Templates
© SprinG
eXTReMe Tracker