Wednesday, July 25, 2007
محمد شرقاوي و ملامح

يعلن أحمد ناجي أنه سينشر روجرز ، و الناشر دار نشر جديده اسمها ملامح ، بسرعه نسمع ان مينا جرجس سينشر النبي الإفريقي ، و بعدها عمر مصطفى، سينشر ديوان بعنوان


محمد شرقاوي أسس ملامح ، ألف مبروك ، مع ان المعلومات قليلة جدا ، عرفت ان مقر الدار في جاردن سيتي في شارع الديوان ، و موقع الدار هناك


المهم ، طبعا سرت مع القطيع و طلبت من ناجي نسخة موقعه ، و طبعا وعدني بأريحية ، و لما فكرت بشكل عملي وجدت الموضوع فاشلا بكل المقاييس ، ناجي سوف يأخذ عددا قليلا من النسخ من شرقاوي ، بلا مقابل طبعا ، مما يعني خسارة حتمية لشرقاوي ، أيضا مبيعات غير حقيقية لناجي ، و تخيلوا دار نشر توزع 50 نسخة بالمجان من اول 3 اصدارات لها ، خراب بيوت مستعجل ، و لا اظن شرقاوي ينقصه خراب البيوت


واتتني فكرة جميلة ، طبعا كلنا سعداء جدا – انا شخصيا سعيد – بماسورة النشر التدويني التي انفجرت ممثلة في ملامح ، لماذا لا ندعمها جميعا؟ دعم مادي يعني مش نصقف و خلاص


أرى أنه يجب على كل من يحب الأربعه أعلاه أو حتى أحدهم أن يسهام في نجاحهم ، اشتري الديوان ، و لا تقبله كهدية ، اشتري الرواية من شرقاوي شخصيا بصفته ناشرا ، او اشتريه من مقر دار النشر ، أو من أي مكان ، فقط ادفع ثمنه و لا تقبله كهدية بلا مقابل


لننظم حفل توقيع ثلاثي – على فرض أن هناك 3 اصدارات فقط – و ليذهب كل من يحب مينا أو ناجي أو عمر ، انا مثلا لا أقرأ الشعر ، و لكني سأشتري ديوان عمر مصطفى لأبدأ في قراءة الشعر ، أيضا لأساهم في نجاحه ، كلنا نعلم أن المبيعات هي دليل النجاح الوحيد ، و كلنا نحب أن نراهم ناجحين

posted by ربيع @ 7/25/2007 11:59:00 AM  
31 Comments:
  • At 3:08 PM, Blogger Ma3t said…

    انا مقررة انى هاجيب نسخة منهم لنفسى
    عايزة يبقى عندى نسخة بتاعتى و بفلوسى
    :)
    هيهي قال يعنى

     
  • At 3:15 PM, Blogger أحمد said…

    اتبرع ولو بجنية
    :-)
    ربنا يا ابنى يجزيك على اد نيتك ويرزقك ببنت الحلال واشوفك مهندس مقاول كدا وربنا كارمك زى ما كرم عثمان أحمد عثمان

     
  • At 3:29 PM, Blogger ربيع said…

    ماتنكرش يا بيسو ان الفكرة جميلة و عاجباك ، زي ما هي جميلة و عاجباني ، يا اخي اديني الإجو بتاعي كمان شوية

     
  • At 3:30 PM, Blogger ألِف said…

    أنا كمان كنت ناوي أشتري نسخ مؤلفات الأساتذة.

     
  • At 3:32 PM, Blogger ربيع said…

    يا ددعان ، ألف بيأيدني يا ددعان
    احنا نعمل حملة قومية لشراء مؤلفات الأساتذه!

     
  • At 3:49 PM, Blogger ahmad said…

    أنا شايفغ اننا نشتري بفلوسنا ، و لو اني مش مرتاح لاسعار الدار اللي في جاردن سيتي دي!! لكن حنشوف ، بس ع الاقل الاساتذة يمضوا الكتب ، و بيسوا يكتب اهداءات للمزز ، و هو عندو ديسلكسيا ، و حتبقى حاجة مسخرة
    :)

     
  • At 6:13 PM, Blogger أحمد said…

    اتفرج يا عم شوف بقي مين اللى بيتكلم عن

    اسعار جاردن سيتى

    :-)

     
  • At 6:58 PM, Blogger ربيع said…

    ماهو شخص قاري و دارس المنتيأة كويس و عارف المستخبي و السعر و الذي منه

     
  • At 7:06 PM, Blogger ahmad said…

    نشر غسيل ع الملأ مافيش داعي ، كل واحد يخليه في حاله و إلا ....
    :)

     
  • At 9:07 PM, Anonymous مراقب مصري said…

    طب ممكن فكرة حضرتك عن أسعار كتب الأساتذة عشان بس تظبيط الميزانية؟

     
  • At 9:09 PM, Anonymous مراقب مصري said…

    يا ريت كمان لو شرقاوي يعمل بروشور إلكتروني تعريفا بالإصدارات الجديدة فنبقى بنشتري واحنا بجد واحنا عارفين بنشتري إيه... بدل شرا الكتب على طريقة تعاطفك لوحده مش كفاية

    ;-)

     
  • At 11:46 PM, Blogger ربيع said…

    يا عم مراقب شرقاوي عامل فيها أسرار عسكرية ، لا اعلان و لا بدنجان ، برشور ايه يا راجل

     
  • At 12:59 AM, Blogger hilal said…

    أنا مستمتع بالكرّ والفرّ ده المذيَّل بابتسامات
    :-)

     
  • At 10:04 AM, Anonymous حَمُكْشَة said…

    يا لك من إنسان نبيل وعاقل معا يا ربيع.

     
  • At 10:21 AM, Blogger ربيع said…

    شكرا حموكشة باشا
    هلال ، و الله معاك حق ، حلوه أيام الابتسامات و الضحكات ، فين أيام الشخر و سب الدين و الأم

     
  • At 1:23 PM, Blogger كوازيمودو said…

    ولا تزّعل نفسك يا مان.. كلكوا على بتاعى، وبعون الله تبقوا متستّفين عليه زى اللحمة على سيخ الشاورمة.. وعلى صعيد آخر، ان منشكح جداً من الخبر دا، مع انى معرفكوش اوى، وياريت بس حد يقولى فين وامتى سيتم تدشين هذا الحدث عشان احضر واتعرف عليكوا

     
  • At 2:40 PM, Blogger جوستيـن said…

    صاحب واجب طول عمرك

     
  • At 3:31 PM, Blogger ربيع said…

    با باشا انت تشرف
    بس ابقى ورينا شطارتك و طلعه على الملأ

     
  • At 5:05 PM, Blogger tagreba said…

    هو من ناحية انه بعنوان، فهو بعنوان ان شاء الله، وده خط استراتيجي لن نحيد عنه حفاظاً على التميز ومبدأ العنونة

    العنوان "أسباب وجيهة للفرح" سعادتك، وهننشره في قسم الأطفال في الدار

    شكراً على دعوتك الكريمة، حقيقي اتأثرت ;-P

     
  • At 5:45 PM, Blogger ربيع said…

    هيهيهيهي
    و الله ماخدتش بالي الا دلوقتي ، معلش كفايه تصحيحك يا باشا
    بس النكته ان ماحدش من اللي قروا أخد باله!

     
  • At 6:58 AM, Anonymous AMS said…

    طب انا ليا سؤال

    هل النسخه اللى نشرها ناجى فى موقعه هيا النسخه الكامله اللى هينشرها فى ملامح ولا
    ايه النظام؟

    تمنياتى للجميع بالنجاح

    :-)

     
  • At 7:28 PM, Blogger sharkawy said…

    مساء الخير عليك يا ربيع بيه
    شكراً لمبادرتك بحملة التضامن وعلى رأى بيسو:
    أتبرع ولو بجنيه..


    ma3t
    الدار كلها تحت أمرك..
    يعنى الكتب وإللى كاتبينها -بالنيابه عنهم أنا - وانا نتمنى أنك تكونى مبسوطة وتدينا شرف أنك تقرى اعمالنا الغير متواضعه واللى هى عظيمة خالص..

    مينا ذكرى..
    خصم خاص ليك بمناسبة الافتتاح ..
    اتلكتاب ابو 9 هنضربه فى 2 وعشان تعرف انك غالى عليا قوى..

    ويبقى أنى أشكر
    عمر مصطفى ، أحمد ناجى،،مينا جرجس،

    كمدونين وأصدقاء..


    الكتب الخمسه الأولى:
    عن الهمس الذى يشيح بوجهه ديوان شعر سعيد أبو طالب 9

    أسباب وجيهه للفرح ... شعر عمر 15صطفى

    النفس والجنس والجريمة(من ريا وسكينة حتى بنى مزار) دراسه د. خليل فاضل 25


    النبى الأفريقى نصوص مينا جرجس 9

    روجرز رواية أحمد ناجى 15

    الارقام دى هى الاسعار للجمهور..

    خصم خاص للمدونين ...

    يا مينا يا ذكرى انت تضرب السعر فى 2 يعنى ابو 9=18

     
  • At 7:50 PM, Blogger ربيع said…

    زي الفل ، انت شرفت يا باشا
    لو ممكن تقلنا امتى الحاجات هاتنزل
    و لو ممكن كمان تسمحلنا نزور المقر يمكن نقدر نساعد بأي مجهود

     
  • At 8:42 PM, Anonymous ghost said…

    15
    جنيه
    روايه ناجى
    احه جدا

    ياجدعان اللى عايز روجرز يقول وهابعتهاله على ميله

    دا ميلى
    silly0ghost@gmail.com

    للمزز خصم خاص
    وترحيب بالشات مفيش اى مشاكل من هذه النحيه

     
  • At 10:00 PM, Anonymous sharkawy said…

    الاسبوع الاول من أغسطس هتكون الاصدارات موجوده فى المكتبات وهنعمل افتتاح فى نفس الاسبوع..

    اللى يحب يزور أو يشارك فى دار النشر يتفضل طبعاً..
    معلومات أكتر عن الدار بعد شوية على الموقع
    www.malamih.com

     
  • At 12:31 AM, Blogger zsinfulangel said…

    mbroook =D
    23obal ma sharkawy ynzal dewan howa kman =D

     
  • At 2:52 PM, Blogger أحمد said…

    النسخة الالكترونية التى سبق نشرها ليست كاملة، كما أنها تحتوى على عدد كبير من الأخطاء الإملائية والنحوية وتم حذف اكثر من فقرة فيها وإضافات فقرات جديدة

    استمتع بها
    :-)

    يا عم الشبح

     
  • At 4:03 PM, Blogger Aladdin said…

    يا ريت برده المؤلفين المذكوريين يقوموا بالقدر المعقول من "الدعاية" لمنتجهم في مدوناتهم الخاصة! سمعت أن ناجي قام بهذا بالفعل، لكنني لم أجد أية إشارة من هذا في مدونة عمر مصطفى!!

    أظن أن شرقاوي بحاجة ماسة إلى التعاون مع عدد من النقاد (حبذا الشباب) لقراءة الإصدارات الجديدة في مقر الدار. للندوات وجلسات القراءة أثر مهم للتعريف بالشعراء والروائيين حديثي العهد بالنشر الورقي خاصة أنهم أختاروا النشر في وسيط "غير تدويني" - إذا جاز التعبير.

     
  • At 12:30 AM, Blogger ربيع said…

    كلام علاء ممتاز طبعا ، يعني أظن ان الناس بتتكسف شوية من الإعلان عن كتبهم في مدوناتهم ، عشان كده تلاقيهم بيحطوا صورة و لا جملة بسيطة و خلاص ، يا جدعان شوفوا محمد علاء الدين بيعمل ايه ، مش عيب و الله
    اما شرقاوي فمصيبته سوده ، يعني أظن ان وراه بلاوي متلتلة ، بس ممكن يعوض القصور في الاعلان بالتوزيع الجيد ، و ده هيبان بعدين طبعا
    يا خبر بفلوس

     
  • At 12:27 AM, Blogger Aladdin said…

    الكلام عن الدعاية للأعمال الإبداعية المكتوبة يمكن أن تفرد له تدوينة كاملة على الأقل. لست متخصصاً في "التسويق" بوجه عام، لكن هناك الكثير من الاستراتيجيات "التقليدية" طبعاً وغير التقليدية للتسويق لأي كتاب حتى لو "المضمون" النداء الشعبي "ريّان يا فجل!!"

    اقتراحات سريعة للترويج للكتاب (بدلاً من قصة "الهدايا" اللي مضايقة ربيع) .. طبعاً الكلام موجه لشرقاوي وغيره من أصحاب دور النشر الجديدة:
    (1) ندوات موجهة للشريحة الهدف (يعني لماذا لا تعقد ندوات مشتركة مثلاً بين "ملامح" ومجموعة PTP بالاتفاق مع محمد الرزاز أو في الكتب خان (كرم يوسف) للدعاية أكثر للإصدارات الجديدة (بالمناسبة وجدت دواوين الشاعرة والمدونة سوزان عليوان تباع في الكتب خان).
    (2) عروض الكتب - سواء في الصحف والمجلات الالكترونية أو الورقية. أظنك يا شرقاوي محتاج شوية علاقات بصحفيين في مجلة واسعة الانتشار مثل "بص وطل" مثلاً على أساس تُكتب عروض للكتب الصادرة حديثاً.
    (3) الاشتراك في المسابقات الأدبية - دا طبعاً للمؤلفين لأن الخطوة دي فعلاً مهمة من أجل التعريف بالكاتب والكتاب (والتي غالباً ما يتم تغطيتها إعلامياً من القنوات المتخصصة ذات الصلة).
    (4) حاول الاشتراك (الكلام لشرقاوي) في معرض الكتاب الدولي السنوي إلى جانب معارض الكتاب الدورية خاصة في الجامعات على أساس أن طلاب الجامعة شريحة مهمة لا يمكن إغفاله في أية خطة تسويق للكتب التي تصدر الدار التي تملكها وتديرها.

     
  • At 1:26 PM, Blogger R said…

    هاشتري الكل طبعاً علشان باحب الكتاب دول.

    بس أنا معترض بشدة على رفع التدوينات المنشورة من المدونات المذكورة

    بس

     
Post a Comment
<< Home
 
 
عن شخصي المتعالي
مدونات
روابط
كتب
أخبار
Free Blogger Templates
© SprinG
eXTReMe Tracker