Saturday, October 25, 2008
نون التحرش

تزامن الحكم بالسجن على المتحرش بنهى رشدي مع كلنا ليلى كان له أثر واضح ، الكثير من المدونين كتبوا طويلا عن الموضوع ، الغالبية العظمى كتبت تهنئة لنهى ، القليلون جدا أعملوا فكرهم و كتبوا عن الموضوع من وجهة نظر انتقادية

تدوينة بنت القمر جاءت في الصميم ، و أثارت نقاطا لم أفكر فيها عند قراءة الخبر لأول مرة ، و أكثر ما أثار تعجبي قيام نهى باصطحاب المتحرش بسيارتها الى القسم ، فلا أفهم كيف أجبرت شخصا بهذه الجرأة على ركوب سيارتها ، بل كيف استطاعت الامساك به و منعه من الهروب طوال فترة الخناقة؟

عبده باشا كتب عن الموضوع بحيادية حتى ظننت أن لا رأي له في الموضوع ، أو أنه يخاف هجوم ذوات الألسنة الطويلة عليه ، و لكنه أثار فكرة صناعة الحدث الإعلامي

نهى رشدي فتاة ذكية ، تعلم من أين تؤكل الكتف ، الحادثة عادية تماما ، و هي كما أشار عبدو باشا الى أنها ليست الأولى ، و الى أن الحادثة الأولى المماثلة قديمة جدا ، و بالتأكيد هناك الكثير من الحوادث المماثلة و الشبيهة في تاريخ القضاء المصري ، و لتخفيف شدة الحديث ، ألا تذكرون زينات صدقي عندما وضعت مفتاح المطبخ في صدرها ، و حاول اسماعيل ياسين جاهدا انتشاله بالكبشة؟ ، لماذا لم يستخدم يده؟ بالتأكيد هناك قانون يعاقب المتحرش على فعله ، الفرق فقط في التسميات ، القانون يسميه هتك عرض ، و لا يسميه تحرشا.

نهى رشدي بعلاقاتها و معارفها نشرت الخبر في الصحف و أصبح حديث الناس ، أو على الأقل أصبح حديث شريحة معينة من الناس ، في الحقيقة لو أصابني مكروه لفعلت الأمر ذاته ، دعم المحيطين ضروري و مطلوب من الناحية النفسية في مثل هذه الأحوال ، أيضا الضغط الإعلامي مطلوب لتحقيق مآرب أخرى

بالطبع للضغوط الإعلامية تأثير على القاضي ، في النهاية ، العدل هو ما يريده المجتمع ، و لا علاقة للعدل المطلق بما يحدث في المحاكم في أي مكان بالعالم ، و بالتالي أرى أن الحكم عادل ، طبقا لما يراه القاضي في ظل القانون الذي أقره المجتمع

فقط ينقص الحكم التشهير ، أرى أن التشهير جزء اصيل من عقوبة المتحرش أو هاتك العرض ، المتحرش أو هاتك العرض شخص لن أتواجد معه في مكان واحد ، لن أسمح له بالدخول الى بيتي ، و في حالة السائق المتحرش لن أستخدمه كسائق ، هو شخص غير مرغوب فيه ، و لا علاقة لي بتوبته او عدمها ، فأنا لا أطلع على القلوب

أسوأ من قام بالكتابة عن الخبر شلة الليبرليين الجدد ، اللذين يحاولون جاهدين الربط بين التخلف و الحجاب ، هذه المره ربطوا بين نهى السافرة و بين الجدعنة ، و اشاروا الى أن السفور هو سبب أصيل للجدعنة و الجرأة ، و أن الحجاب هو سبب أصيل للضعف و التخلف ، و كأن شخصيات مثل بنت الشاطيء و صافيناز كاظم و أم فتحي بوابة عمارتنا القديمة ، كلهن شخصيات وهمية

posted by ربيع @ 10/25/2008 02:08:00 PM  
9 Comments:
  • At 2:41 PM, Blogger عزة مغازى said…

    اولا
    ويلكم باك
    كفارة يا ربيع
    ثانيا
    فعلا تدوينة عبد الرحمن وتدوينة بنت القمر ردا على تدوينة احمد شقير هما اهم تدوينتين كتبتا حول قضية نهى رشدى

    من الصعب ان تطبق عقوبة ذات اساس اجتماعى اى تحتاج لتوافق اجتماعى مثل عقوبة التجريس فى ظل حالة التفكك المجتمعىى الحالية الم تلحظ كما لحظ العديدين ااتعاطف الشديد مع الجانى
    لقد حاولت اثناء ركوبى المواصلات فى اليوم التالى وما يليه لصدور الحكم ان ارمى ودنى كويس لاعرف ردود الافعال
    صدقنى السيدات قبل الرجال فى مترو الانفاق كن يتساءلن
    طب ويعنى الواد يعمل ايه
    هى الغلطانة فضحت نفسها
    هذا هو اكثر التعليقات رحمة
    دعنى اقل لك انها وصفت بانها عاهرة وربما احط

     
  • At 3:06 PM, Blogger ربيع said…

    أظن ان ده سبب أدعى للتشهير ، الصورة مهمه جدا للتأثير على الناس ، لو اتحطت صورة المتحرش و تحتها اسمه في الجرنان التأثير هايكون قوي جدا ، لاحظي صور نهى اللي كلها بتنقل وش الفتاة البريئة الحالمة ، مش البنت القوية المفترية و لا البنت الغلبانه المنكسرة
    طبعا التشهير ده بيقوم به الإعلام ، و ماعرفش اذا كان ممكن القاضي يأمر بيه و لا لأ

     
  • At 4:43 PM, Blogger bluestone said…

    حمدلله ع السلامة
    ده اولا

    متفقة تماما مع عبد الرحمن في مسألة استغلال الواقعة اعلاميا .. وبكره الاعلام جدا لما بيحصل ده
    لانها حاجة رغم مشروعيتها الا انها حقيرة جدا وغير اخلاقية

    مش عارفة ليه انت كان رأيك ان نهى صاحبة الواقعة المشهورة تعرف من اين تؤكل الكتف؟؟

    رأيي ان الظروف خدمتها تماما ولحد دلوقتي مش قادرة افهم ازاي اقتادت الراجل في سيارتها للقسم

    بس بعيد عن الواقعة ومدى معقوليتها وملابساتها
    هي تحمل تشجيع ايجابي للبنت انها ترد وماتتصرفش بسلبية وفي نفس الوقت هو تشجيع خطير
    لان مش كل متحرش في الشارع هيبقى لطيف ويرضى يجي معايا في عربيتي اوديه القسم

    انا مش مع ليلي او على الاقل بصورتها الحالية .. بس لا يمكن انكار ان معدل الذكور في تزايد مستمر
    بينما تتناقص معدلات الرجولة بفظاعة

     
  • At 12:02 AM, Blogger FATMA said…

    هو الموقف و البنت زي ما قال عبده باشا صالح للاستخدام الاعلامي
    مكنش ينفع يتفوت اعلاميا الواقعة كلها كأنها سيناريو معد مسبقا و محدش و مختار ابطاله و مكانه بدقه متناهية
    موضوع بأى ان الناس يستخدموه للهجوم على الحجاب مثلا فدا لأن الناس دي عايشين عشان يهيصو في الهيصة

     
  • At 12:50 AM, Blogger السهروردى said…

    حقيقةً أنا مخنوق من الحكم لأنى شايفه مبالغ فيه حبتين
    وحاسس انه بنظام "اللى حيعمل كده تانى "حيتظبط
    بيفكرنى بحكاية المثل اللى بيقول "براس الديب اللى طارت"
    بمناسبة اخواننا الليبراليين اللى زايطين فى الزيطة ما شفتش عوام المتدينين والاسلاميين وهى بتعلق على حوار نهى فى "اليوم السابع" بإنها لو محجبة كان حيحميها من التحرش.. إلى آخر هذا الخراء

     
  • At 3:01 AM, Blogger بنت القمر said…

    عزة مغازي
    =============
    تدوينتي اللي هي رد علي شقير غير اللي يقصدها ربيع
    هو يقصد مش كلنا نهي رشدي
    بصي علي اللينك يا عم الحاج
    - الاستاذ ربيع:الفكرة من بوست مش كلنا نهي لو ركزتها في كلمتين ان المواجهة الجسديه مش ناجحه ولاتنفع من كل الفئات العمريه غالبا
    يعني مجيش لطفله اقولها جرجري اللي يتحرش بيكي للقسم او ست كبيره
    -الفكرة 2 ان مش كل فشل في المواجهة يجعل الضحيه مش بطله و جبانه لان واقعه نهي رشدي استثناء.. مش كل متحرش اهبل
    عشان كده زي ما قلت عندي ده متحرش اهبل عاوز 10 سنين
    - انا مش عاوزة اعفي الدوله من التهاون او التقصير يعني في اسكندريه حيث اقيم اي مول او مدرسه مفيش قدامهم عسكري يتيم يهوش او يحل في اي خناقه
    مش عشان التحرش بس
    يعني ممكن السرقات كمان
    قريبه لي شاب خطف سلسله من رقبتها وسبب لها جرح قطعي في رقبتها لان السلسه كانت قويه
    وقدام مول كبير والناس اللي عملته معلش يا مدام يعوض عليكي ربنا!!
    هنا الدوله نايمه في العسل واتخلت عن دورها الاساسي في حمايه المواطنين
    وكان حاله الهياج بالحكم علي متحرش نهي
    كأن الحل ان كل بنت تنزل الشارع بمطوتها ومنها للناس بقي
    كل واحده وصحتها
    وتبقي نظريه اللي يقرب منك افتحي راسه!!!
    والنس سلبيه وخلاص خلصت البلد والدوله علي كده
    المؤسف ان حالات تحرش تانيه... القدرة علي المواجهة بتبقي معدومه زي حالات التحرش الجماعي او في العيد حرام نظلم البنات دي وتبقي نهي بس الايقونه والرمز ويبقوا دول جبنا وولاد ستين
    كل حاله لها ظروفها
    بس الناس مقهورة ومحتاجه لبطله او بطل عشان يرضيهم نفسيا ان العدل اتحقق في البلد دي
    يعنيمن العاشره الي البيت بيتك الي الحياه
    ناقص نهي تنزل من الحنفيه كمان ماشيه بالتوازي مع حكايه سوزان تميم
    معلش طولت
    اخر حاجه
    انا مشوفتش اسلاميين بيقوا اصلها مش لابسه حجاب!!
    كل الناس عارفه ان التحرش ما بيعتقش لا كبيره ولا صغيره ولا محجبه ولا منقبه
    وهي البنت نفسها قالت انها كانت محجبه في فتره ما وتم التحرش بيها برضه
    بخصوص التجريس بقا
    تفتكر لما الراجل ده ها يطلع من السجن اول ست ها يقابلها ها يعمل معاها ايه؟؟
    هل عينه ها تتكسر في الارض ولا ها يطلع وحش وينتقم بس بذكاء وبعنف اكتر؟؟
    تحياتي

     
  • At 10:52 AM, Blogger ربيع said…

    يا سهروردي احنا بقينا بلد المتطرفين ، في كل مجال و على كل جانب ، الزمالكاوي متطرف و الأهلاوي برضو و اللي بيشجع الجيش متطرف ، المتدينيين متطرفين و ده باين أوي و الجديد الليبراليين المتطرفيين و اللي ماكناش نعرفهم قبل كده ، رامز شرقاوي بيقللي انهم مش عارفين يعني ايه ريبرالية من الأصل ، تخيل واحد بيعدو للحرية بس ما هو شايف انها حريته الشخصية فقط ، بالعكس بيعمل زي المتطرفيين على الجانب الآخر و بيقلك الحجاب سبب التخلف
    أنا بافكر أهاجر في حته مافيهاش مصريين

     
  • At 11:34 AM, Blogger عباس العبد said…

    ربيع
    صباحو فل أن شاء الله
    --
    زعلتنى منك يا رجل
    نهى مين و الناس نايمين ؟
    تحرش ايه و انتهاك ايه ؟
    انت بتصدق الكلام ده
    انا بس لو فاضى و قادر اركز شوية كنت كتبت تدوينة رزعت فيها اللى واقف فى زورى
    انت كمان بتشارك ؟ لا يا صديقى انا كده تأثرت جداً
    هههههه
    --
    كله كوم و الليبراليين الجدد دول كوم تانى
    مدوناتهم كوميدية جداً
    و ربنا يستر

     
  • At 12:54 PM, Anonymous lonewolf said…

    طب ما كل الشخصيات الي قلت عليها في اخر سطر في تدوينتك دي شخصيات خيالية!

     
Post a Comment
<< Home
 
 
عن شخصي المتعالي
مدونات
روابط
كتب
أخبار
Free Blogger Templates
© SprinG
eXTReMe Tracker