Monday, June 22, 2009
يا ولادي ، هما مصريين
يا ولادي يا ولادي يا ولادي
مصر بلدنا هاترفع راسنا
انا هاحكيلكوا حدوته .. حدوته .. حدوته صغيرة .. قد كدهو (و أشار بطرف سبابته)
امبارح يا ولادي ، امبارح ، المنتخب اتهزم يا رجالة ، فيها ايه لما ننهزم ، "الكورة مكسب و خسارة" ، و ياما كسبنا ، ياما يا ولادي ، ده حتى الواحد من كتر ما الأهلى أخد الدوري و الكاس و القزازة ، زهق من المكسب و بقى عايز يحس بروح الخسارة ، لانك كل ما تخسر تقوى ، تبقى أقوى
امبارح يا ولادي ، واحد اسمه عمرو اديب ، صحفى مش عارف ، مذيع مش عارف ، اعلاني مش عارف ، قعد يقول كلام مش حلو عن اللعيبة ، قالك ايه؟ ، قالك كان جايبين بنات في الاوض بتاعتهم ، استغفر الله العظيم ، لا يا ولادي مصر مش كده
عمرو أديب – و هو مش بيفهم في الكورة ، و ده كلام من بق واحد بيفهم في الكورة – ربط ربط غير موفق ، و غير صحيح ، و غير منطقي خالص ، بين أخبار منشورة في جرايد جنوب أفريقية صفراء ، و بين حالة اللعيبة المتدنية في الماتش ، يا ولادي مصر مش كده ، و قعد يقول كلام مالوش معنى ، مالوش معنى خالص ، من عينة ، ان ربنا هو اللي كسبنا الماتش اللي فات ، يا ولادي ، و من عينة ان كان فيه نجاسة في الملعب امبارح ، يا ولادي ، و من عينة ان الناس دي لازم تتحاسب ، يا ولادي ، لا يا ولادي ، لعيبة مصر ماتتحاسبش ، حسن شحاته مايتحاسبش يا ولادي ، تحققوا معاهم؟ ازاي؟ هما مجرمين يا ولادي؟
المهم يا ولادي ، اللعيبة اتصلوا بيه ، و كانوا مؤدبين جدا خالص ، و قالوا كلام زي العسل ، سكر معقود ، شهد ملكات النحل ، لدرجة ان عمرو أديب دلدل ودانه ، و وطى راسه و زعل من نفسه
اللعيبة قالتلك يا ولادي ، انهم بيصلوا الفجر حاضر ، و انهم بيقروا القرآن مع بعض ، الله ، الله على الاتزام ، شايفين النموذج؟ و الله نموذج ، اللعيب المؤمن ، لعيب أخلاق القرية ، اللي بيروح الجامع أو الكنيسة عشان يصلي – وحدة وطنية – الله على الأخلاق ، الله على الوطنية ، اللعيب ده ممكن يجيب بنت في اوضته ؟ لا يا ولادي ، أبدا ، دي مش مصر يا ولادي ، مش دول الأبطال اللي هزموا بطل العالم واحد صفر ، مش دول يا ولادي ، يا ولادي يا ولادي يا ولادي
و واحد منهم قال ، الشتيمة ماتجيش من جوه البيت ، صح كلامك ، انت يا كابيتن عداك العيب ، الشتيمة تيجي من بره البيت يا ولادي ، خصوصا و اننا عارفين انها شتيمة ، و اننا باصمين بالعشرة و متأكدين ان لاعيبتنا نضيفة ، و انهم مادخلوش بنات لاوضهم ، يا ولادي ، الشتيمة ماتجيش من جوه البيت يا ولادي.
يا ولادي ، انا مهموم بحال بلدنا ، و الله مهموم يا ولادي ، و مش عايز شوية إعلانيين زي عمرو أديب يتحكموا فيها ، يا ولادي ، لو ابنك لقيته بيشرب سجاره ، هاتعملوا ايه؟ هاتدير وشك الناحية التانية عشان يكمل السجارة ، و مش هاتقوله حاجه ، ماهو ابنك برضو ، وا نت يا أخي بتدخن ، يعني هي حرام عليه حلال عليك؟ ، يا ولادي ، السجاير و الناسوان مافيهومش خيار و فاقوس
و بعدين يا ولادي ، دول نص أساميهم محمد و أحمد ، يا ولادي ، ممكن محمد يدخل بنت أوضته؟ ممكن أحمد يعمل كده؟ انا راضي ذمتكو ، أي حد من محمدات أو أحمدات المنتخب المصري على مر الزمن ، تجرأ و دخل بنت أوضته ، يا ولادي ، حكموا قلبكوا ، و برضوا عقلكوا
يا ولادي دي صحافة صفراء ، صحافة جنوب افريقيا ، فين دول من صحافتنا العريقة ، أهرام أخبار جامهورية ، فين دول من كبار كتاب الأعمدة و المقالات ، أهرام أخبار جامهورية ، فين الصحافة دي من جرايدنا المستقله الحرة ، أهرام أخبار جامهورية ، فين دول من اعلامنا الشفاف ، أهرام أخبار جامهورية ، فين دول من قصور ثقافة مصر العامرة دوما بالمفكرين ، أهرام أخبار جامهورية ، فين دول من الهرم و أبو الهول يا ولادي؟
يا ولادي يا ولادي يا ولادي ، يا ولادي يا ولادي يا ولادي ، يا ولادي يا ولادي يا ولادي ، يا ولادي يا ولادي يا ولادي ، يا ولادي يا ولادي يا ولادي ، يا ولادي يا ولادي يا ولادي ، يا ولادي يا ولادي يا ولادي ، يا ولادي يا ولادي يا ولادي ، يا ولادي يا ولادي يا ولادي ، يا ولادي يا ولادي يا ولادي ، يا ولادي يا ولادي يا ولادي .
يا ترى هانسكت على الكلام اللي اتقال ده؟ لأ طبعا ، لازم نقف كلنا في وش عمرو أديب ، و نقله انت غلطان ، و دي جرايد صفرا ، و انت مش بتفهم في الكورة ، ولا بتفهم في الفلسفة ، بس احنا يا ولادي بنفهم في الكورة ، و بنفهم في الفلسفة ، و بنفهم أكتر من أنيس منصور في الفلسفة ، و بنفهم في أخلاق اللعيبة بتوعنا ، و بنفهم في أخلاق القرية ، و بنحترم قانون العيب ، قانون العيب يا ولادي اللي حاطه محمد أنور السادات ، محمد انور السادات ، محمد انور السادات يا ولادي ، لعيبتنا مش أقل من أبطال محمد أنور السادات يا ولادي ، و لا أقل من اللي عبروا يا ولادي ، و مهما كانوا ، هما مصريين.
حتى لو ظهر يا ولادي انهم جابوا بنات للأوض بتاعتهم ، و ماله يا ولادي . ، فيها ايه يعني؟ بيروحوا عن نفسهم ، مراهقة ، طيش شباب ، المهم يحافظوا على نظافة الملايات يا ولادي ، و كفاية علينا ، هما مصريين.
يا ولادي ، كلامي خلص ، انا قلت فيك كل الكلام ، يا ولادي ، مات الكلام يا ولادي ، خليكوا فاكرين ، أحد أعظم مخرجي مصر ، عمل فلم اسمه دكان شحاته ، دكان شحاته ، دكان شحاته يا ولادي ، يا ولادي دكان شحاته ، عارفين ليه؟ ليه؟ ، عشان يبقى سند و عون لحسن شحاته في أزمته ، يا ولادي يا ولادي يا ولادي ، حتى المخرجين و السينما واقفة جنب لعيبتنا ، حتى الممثلين و هيفا واقفين جنب لعيبتنا ، و الأكتر من كده ، هما مصريين.
يا ولادي يا ولادي يا ولادي ، انا مش مصدق الكلام ده ، لا يا ولادي مش أخلاق ولادنا و لا شبابنا ، و لازم لازم لازم ، بيان يطلع من وزارة الداخلية في جوهانسبرج ، و لازم البيان يكدب الجرايد دي ، و لازم يقفلوا الصحافة الصفرا بتاعتهم ، دي صحافه صفرا يا ولادي ، مش نضيفة ، دي صحافة ... صحافة .....، مش عايز أقول ألفاظ قبيحة يا ولادي ، لأن هما مصريين.
يا ولادي ، زمان ، زمان يا ولادي ، لما نا بنشجع مصر ، كان كل واحد مننا ، يروح الاستاد يا ولادي ، استاد مدينة ناصر ، ناصر يا ولادي ، لان ناصر هو اللي بناه ، كان كل واحد يجيب معاه علبة كشري ، و واحد مننا يتبرع و يجيب راديو ، نضرب علبة الكشري يا ولادي ، و نشغل الراديو ، و كنا يا ولادي على قد بساطة القعدة ، و المصاطب الحجر ، كنا بنستمتع يا ولادي ، الله عليكي يا مصر ، كان مبسوطين يا ولادي ، و كان بنندمج ، بنندمج مع بعضينا يا ولادي ، بننصهر ، بتنماهى ، أضحى التماهي بديلا لشكوانا ، و طاب في الاستاد قعدتنا جاتك نيلا . و كان لما نتماهى ، نشجع كلنا مصر ، تحت علم مصر ، فاكرين يا ولادي كنا بنقول ايه؟ فاكرين هتافات التشجيع كان مؤدبة إزاي؟ فاكرين ؟ ، أكيد فاكرين ، عشان هما مصريين.
كان بنقول :
الجوز الخيل ، و العربية
فلتحيا الكورة المصرية.

posted by ربيع @ 6/22/2009 10:38:00 AM  
21 Comments:
  • At 10:56 AM, Blogger Abdou Basha said…

    أيوه يا كبتن ربيع
    كنا كلنا مستنين تقول كلمتك في المواقف اللي زي دي لما الواحد يبقى محتار وهو بيسمع كلمة من هنا وهناك
    أنا وسعد مختار، وكمال بهجت، وجرجس حبيب والشلة القديمة كلنا كنا مستنين الرد ده، شفيت غليلنا وقولت اللي جوانا
    هو ده وقت كلامك يا كبتن ربيع
    فاكر زمان بعد النكسة، ومش هقول هزيمة لإننا محاربناش
    فاكر عملنا ايه
    عبرنا وهزمنا اقوى جيش في العالم بامر الله، وخطط حرب 73 بتدرس دلوقت في العالم
    ليه بنجرح في بعض كده يا كبتن ربيع
    فاكر زمان لما كنا في مدرجات الجامعة، وبنغني سوا مع محمد نوح .. مدد مدد مدد شدي حيلك يا بلد
    هي دي مصر ياكبتن هي دي مصر
    احنا لازم نعمل حاجة دلوقت في الوقت ده .. الجيل الجديد ممكن يسدق الاشاعات دي.. لازم نسجل كلمتنا
    فيه ناس مش عايزانا نتقدم
    مش عايزينا نفرح يا كبتن ربيع
    ليه
    ليه
    ؟

     
  • At 12:13 PM, Blogger mido said…

    عمرو اديب اثبت انه حمار حصاوى فى الكورة و الاعلام

     
  • At 12:16 PM, OpenID faissl said…

    يا مجرم،يا مجرم،يا مجرم،يا مجرم،يا مجرم،يا مجـ....

    :D :D :D
    أكثر من رائع
    وأوجع من موجع..

     
  • At 12:33 PM, Blogger AhMeDK0rsh0M said…

    الحمد لله ان فى مصرين زيككو
    والله العظيم انى احبكم فى الله
    طمنتونى انى فى ناس بتفهم وتحكم عقلها مش عواطفها
    ما شاء الله لا قوة الا بالله
    المهم

    dr karim say that
    يا جماعة ده تهريج ...مينفعش الناس دى تعمل كده
    و عمر اديب مصدق اصلا و الموضوع كله احتمال يكون متلفق من جنوب افريقيا لان جوزيف بلاتر كان هيحقق فى موضوع السرقة بتاعة المنتخب و الموضوع ده خطير جدا و ممكن يلغى تنظيم كاس العالم لانعدام الامن و طبعا احنا عارفين ان كاس العالم بدخل مليارات للدولة المضيفة و سبق لبلاتر انه حذر جنوب افريقيا من العصابات الموجودة

     
  • At 1:01 PM, Blogger Appy said…

    تسلم ايديك بجد وكيبوردك وكيبور الجيران علشان انا اتغظت واتفقعت وانت جبت حقى

     
  • At 1:33 PM, Blogger خمسة فضفضة said…

    البرازيل كمان اتسرقت واكتشفوا السرقه بعد ما رجعوا من رحلة سفاري

    http://sports.yahoo.com/sow/news?slug=ap-confedcup-robberies&prov=ap&type=lgns

    خلي بقي جنوب افريقيا تشرب

    ياتري هايقولوا ايه المره دي

     
  • At 3:09 PM, Blogger Tinkerbell. said…

    مش ممكن !! أنت وترتنى بموضوع "يا ولادى" ده..

     
  • At 9:05 PM, Blogger misha و lado said…

    greaaat ya rabe3!
    fart Sound !!

     
  • At 9:43 PM, Blogger Alkomi said…

    شوف يا كابتن

    اللعيبة دي ماينفعش معاها غير واحد بس

    احمد ترنس

    نجم بحري و عم زباين قهوة باب واحد

    احمد ترنس هو بطل دورات الشطرنج في باب واحد و خليل و فاروق و السيالة و ساعة صفا و القهاوي المجاورة

    احمد ترنس في ليلة واحدة بيرص صف ادامه من 11 لاعب - نفس عدد اللاعيبة بتاعة الكورة و سيطرته عليهم جامدة جدا - شطرنج يغلبهم كلهم

    احمد ترنس جاهل بصمجي - يشبه من بعيد لمدربي الكورة - كهربائي و هو سر تسميته بهذا الاسم يشبه الى حد بعيد حسام الدين مصطفى المخرج اللوذعي الى جانب بعض التاثيرات العصبية اللاارادية المرتسمة على شاربه فيما يفوق تلك المتعمدة على شارب صلاح منصور و على انفه و تحت عينيه و على وجنتيه

    احمد ترنس يتمتع ببذائة لسان لا مثيل لها - يشبه ايضا بعض لاعبي الكورة و مدربيهم - الا انها تقلب اتخن فيل على ضهره من شدة جرعة الكوميديا فيها

    احمد ترنس يبدء الجيم دائما بعبارة اولها الاحترام و اخرها الواقع الذي يحدث على الرقعة - يشبه لاعبي الكورة اللي بيبدءوا الماتش بالفاتحة و ينهوه بفضيحة ناتجة عن مستواهم الخرة - فيقول لمنافسه

    يا بُني يابُني يا بُني

    ثم يتنهد و يرجع الى الوراء

    انا هان**ك

    احمد ترنس تجلبه ادارة نادي الاتحاد السكندري في المباريات الصعبة ليجلس خلف الجهاز الفني للفريق المناسب ليقوم بالارهاب اللازم حتى يتحقق الفوز المظفر لفريق الاتحاد

    يا بُني يابُني يا بُني

    فكك و كبر دماغك

    هما مصريين و احنا برضه مصريين

    و ما استحق ان يولد من عاشه لنفسه فقط

    دول لاعيبة بتشقى

    اي و الله بتشقى يعني بيفرحونا و يزغزغونا و يكسبو و السلع تغلى -اكبر تجسيد لبعابيص الفرح - يبقى هنقفلهم في المصلحة اللي عملوها يعني

    بجملت يا جدعان من البعابيص الي بتيجي من وراهم

     
  • At 2:21 AM, Blogger أفندينا said…

    الله يفتح عليك ، والنهارده عمرو أديب أعتذر على الهوا ده غير أن لاعبي البرازيل تعرضوا للسرقه برضه ... أحييك جداً وبشده على فكرة ياولادي

     
  • At 1:32 AM, Blogger Mohamed Anwar said…

    thank you -شكرا
    http://24all.blogspot.com http://pc4all2all.blogspot.com

     
  • At 1:32 AM, Blogger Mohamed Anwar said…

    thank you -شكرا
    http://24all.blogspot.com http://pc4all2all.blogspot.com

     
  • At 3:51 AM, Blogger Alkomi said…

    يا عزيزي كلنا لصوص

    حاسس بالتاثير على العنوان

    و سمعني سلام الجوز الخيل الاصلي

     
  • At 1:10 PM, Anonymous Anonymous said…

    دا عمرو خالد اللي بيتكلم مش هيك؟

     
  • At 10:25 PM, Blogger Lone Wolf said…

    ها ابتدي اصدق كلامهم انك افلست فنيا و بقيت تعتمد علي الاغراء :)

     
  • At 10:39 PM, Blogger ربيع said…

    شفتني و أنا مغري؟

     
  • At 12:30 AM, Anonymous Anonymous said…

    والله والله ولله والله والله والله والله واللهي من احسن الحاجات اللي قرتها فيحياتي
    كلام ما بين السطور يجيب ازمه ضحك قلبيه
    الله يفتح عليك يا شيخ ربيع

     
  • At 7:38 AM, Blogger Khaled Khalil said…

    باستثناء تعليقات الكومي و الذئب الوحيد (لون وولف عشان لها معنى تاني مقدرش أترجمه), حاسس إن البوست ده رد على التعليقات اللي عليه, مقدرش أقول إنها حرب استباقية لأن الطرف التاني دخلها بإرادته, و الطرفين منتصرين طالما يعتقدوا كده :)

     
  • At 10:49 AM, Blogger ربيع said…

    الذئب الوحيد هو المعنى المقصود ، ترجم المعنى التاني منكم نستفيد يا استاذ

     
  • At 11:42 AM, OpenID Khaled Khalil said…

    الذئب الوحيد مصطلح بيتقال على لما يكون واحد عضو في جماعة ينفذ عملية إجرامية لأهداف سواء في مصلحة الجماعة أو الجماعة مؤمنة بيها لكنها متقدرش تصرح بكده علناً عشان شرعيتها القانونية, الجريمة بيقوم بيها الفرد على مسئوليته الشخصية عشان يبعد الشبهة عن الجماعة, و في المقابل الجماعة ممكن تهربه أو تخبيه.
    التاريخ مليان بحالات من كده, على اختلاف الجماعات من تنظيم محدود لمجموعة دينية أو عنصرية إلى شعب كامل تحت حكم أجنبي.
    http://en.wikipedia.org/wiki/Lone_wolf_(terrorism)

     
  • At 4:09 PM, Blogger ربيع said…

    خالد باشا
    الشخص المقصود فعلا عضو في جماعة سرية ، بس غالبا هو اللي بيزن على دماغ الأعضاء عشان يعملوا الحاجات اللي بتقول عليها دي ، و لو انها في النهاية بتكون حاجات مالهاش علاقة بتاتا بالارهاب أو غيره

     
Post a Comment
<< Home
 
 
عن شخصي المتعالي
مدونات
روابط
كتب
أخبار
Free Blogger Templates
© SprinG
eXTReMe Tracker