كويس يا عمرو ، برافو و الله ، انت مصري كده يا عمرو ، المصريين لما يغلطوا بيعتذروا ، الرجالة بيعملوا كده يا عمرو ، انا حبيت لله في لله يا عمرو.
بس هو فيه شوية حاجات كانت غايبة عنك و انا عايز اوضحهالك ، حاجات وقعت منك كده في الويمين اللي فاتوا يا عمرو ، و انا بصراحة لازم أقولك عليها ، عشان مايصحش أكتمها في نفسي.
بص يا عمر ، احنا شعب رياضي ، المصريين بيحبوا الرياضة يا عمرو ، كلنا كده متربيين على الرياضة ، بنعشق حاجة اسمها كورة قدم يا عمرو ، و الله بنحبها موت . يا عمرو الماتش بيكون مدته ساعة و نص ، احنا بنقعد ساعتين قبل الماتش نتكلم عن التنبؤات أو نتفرج عليها في التلفزيون ، و بعد الماتش بأربع ساعات نقعد نحلل الماتش ، و مع ذلك و برغم كل هذا ، برضو بيكون لينا رأي مستقل ، و مكونين رأي و احنا بنتفرج على الماتش يا عمرو ، ليه مانزلش محمد فكري الصغير؟ ، أحمد الكاس ماكنش في الفورمة ، ماطلعوش ليه من الملعب ؟ ، عويضة كان فل الماتش ده و شال كام كورة حلوين ، كده يعني ، احنا خبراء كورة يا عمرو.
ده الواحد مننا بيلغي مواعيده ، و بيسيب بيته و عياله و ينزل يقعد على القهوة عشان يتفرج على الماتش ، و آه لما نكسب ، الواحد وشه بينور ، و تلاقيه بقى مبسوط كده و مزهزه ، و آه ما نخسر ، بتلاقيه كده يا ولداه زي الفار المسلوخ ، مرخي و دمعته على خده ، ده فيه ناس بتموت يا عمرو ، ناس بتسورق و ماحدش بيلحقها من كتر حزنها ، آه يا عمرو لو تعرف قد ايه إحنا شعب كروي.
بلاش الكورة ، الكورة دي لعبة جماعية كده و مابتعجبش الناس كلها ، تنكر يا عمرو ان كل المصريين بيحبوا السباحة؟ ، ماتقدرش ، تنكر ان كل الاسكندرانية بيحبوا ينزلوا البحر؟ ، ماتقدرش ، تنكر ان مافيش مصري واحد إلا و نزل النيل يا عمرو ، و عداه من الضفة للضفة؟ تنكر؟ لا طبعا ما تقدرش ، و اللي ربنا ماكتبلوش نزولة النيل كان بينزل الترعة يا عمرو.
فاكر يا عمرو ، في 73 ، لما عبرنا القنال ، فاكر؟ العساكر يا عيني كانت تقع من فوق الجسور ، بيجروا من الفرحة فوق الجسور و بعضهم بيقع ، يقعوا في القنال يا عمرو ، يغرقوا؟ لا أبدا ، كانوا بيكملوها عوم ، كانوا بيعدوا القناة عوم يا عمرو، لانهم مصريين ، و كا اللي معاه مدفع يشيله على كتفه و يعديها عوم يا عمرو ، و لما دبابة تقع كانوا يتلموا اربع عساكر و يرفعوها على كتفاهم يا عمرو ، و يكملوا بيها عوم لحد ما يوصلوا سينا يا عمرو ، تقدر تقولي كنا هانعمل ايه لو ماكناش بنعرف نعوم يا عمرو؟
شايف قد إيه الرياضة بتدخل في حياتنا؟ ، آدي الرياضة و الحرب يا عمرو .
بلاش ، سيبك من السباحة و الكورة يا عمرو ، تقدر تنكر ان كل المصريين بيحبوا ركوب الخيل ؟ ، تنكر ان مصر فيها 40 مليون حصان؟ دول أكتر من خطوط الموبايل يا عمرو ، بلدنا كلها ركبت خيل يا عمرو ، و اللي ماركبش خيل ، ركب حمير يا عمرو . تنكر دا؟ ماتقدرش ، مافيش ولا واحد مصري مارحش الهرم وركب خيل هناك ، كلنا ركبنا خير عند الهرم يا عمرو ، حتى الأجانب يا عمرو لما بيجوا مصر يا عمرو ، لازم يركبوا خيل عند الهرم ، مش بس كده ، دول لازم يركبوا جمال – جمع جمل بلاش خيال واسع - يا عمرو.
تنكر يا عمرو اننا لولا حبنا للخيل ، ماكنتش قامت ثورة 19؟ ، تنكر؟ ماتقدرش ، حبنا للخيل هو اللي قوم الثورة دي ، الرياضة و التاريخ يا عمرو.
بلاش كل ده ، انا هافكرك بحاجه ، و باقول هافكرك لانك عارفها كويس ، و شفتها قدامك يا عمرو ، اللعيبة بتوعنا اللي بيصلوا الفجر حاضر ، لما بيسافروا بره ، بيطلعوا من بلدنا مش عارفين ايه بي سي ، و لا حتى ألف به ته ، كام سنة و يرجعوا حافظين شكسبير ، بيقروا جيمس جويس و هما في البانيو يا عمرو ، الله عليهم ولادنا ، عولمة يا عمرو ، ثقافة يا عمرو ، الرياضة و الثقافة.
بلاش كل ده ، انا شخصيا أعرف 17 واحد بيلعبوا جمباز يا عمرو ، محترفين جمباز ، عندهم مزاج جمباز ، مزاااااج ، و أعرف 33 مزاجهم ألعاب القوى ، و منهم 9 بيشتركوا في الجمباز و ألعاب القوى ، الله يا عمرو ، ده غير اللي غاويين رياضات عقلية ، عندك بتوع الشطرنج و الترنيب و الدومنا ، و الرياضات الحركية الساكنة يا عمرو ، الناس اللي بتلعب صلح و صنم و لاعبيني والاعبك لاكسر صوباعك و كلوا بامية القطة العمية ، كل دول نسيتهم يا عمرو؟
بلدنا حلوه يا عمرو.
|
اه يا عمرو لو تعرف يا عمرو